EO面試全攻略懶人包!技巧全拆解!最新模擬試題下載

撰文:daddy最後更新日期:2022-12-10


行政主任EO面試考生須知

EO面試基本資料

根據政府年度招聘要求,EO2除了大學畢業,還需在CRE(綜合招聘考試)中英文兩份試卷取得二級或同等成績、能力傾向測試及《基本法及國安法》測試都要及格。留意報考AO及EO等學位職系時,先要在JRE(聯合招聘考試)合格,而JRE只會每年大約於12月開考一次(2022年考期暫定為12月10日)。

整個面試過程主要分為筆試和面試兩部分。筆試即是 CRE 和聯合招聘考試(JRE),當中JRE的成續更是爭取面試機會的關鍵。應試者需要在3小時內撰寫中、英文文章各一篇。英文題目一般會附上背景資料和數據,要求應考生去分析社會問題或政策;而中文題就多數圍繞具有爭議性的社會議題,要求你去分析並提出意見,題目上未必會附上參考資料,所以絕對能測試你的分析能力和對日常時事與政策的瞭解。

EO面試Panel成員資料

成員職級 思維方向

CEO:Chief Executive Officer
(總行政主任)

人工:MPS 45 - 49 (約12萬左右)

呢位是面試Panel的Chairman,做到呢個位基本上是經驗老道。一般會負責講開場白,叫你自我介紹,問一些關於你背景及CV上的問題。好多時取錄與否都係睇呢個Chairman的決定。一般做得CEO已經五十幾至六十歲,你可以想像呢個年齡段的喜好而作答。

SEO:Senior Excutive Officer
(高級行政主任)

人工:MPS 34 - 44 (約10萬左右)

呢個人多數會問情境問題。情境題通常都係做EO成日遇到的問題/困難,你的應付方法可不可行,佢地一聽就能分辦。因為可能佢地當年都一樣撞過板。應付呢個人,你既思維需要比較周全,盡量唔好有咩漏洞比佢針對,一些細節位例如老闆的感受都要考慮埋。但無論你點樣答,佢都係會搵到位質疑同追問你。

EOI:Executive Officer I
(一級行政主任)

人工:MPS 28 -33 (約7萬左右)

呢個人係場內最低級,一般都係三十幾歲。當你做左幾年之後,就有機會好似呢個人咁樣。呢個人一般問時事問題,同埋關係政府的架構的。問題雖然比較細,但Chairman都會聽到你的回答,所以細節問題都係搶分的關鍵位架。

EO面試流程

面試只設一輪,由三位考官提問。題目的種類大致分為4個部分:履歷題、職系題、情境題和時事題。履歷題就會針對你的CV去作詢問,職系題就會問關於EO的職務等等。而情境題是最關鍵亦是最難的部分。問題會假設你已成為EO,測試你會用什麼方法去解決難題,例如:「假若你帶領的工作隊伍中有人不服從指示,你會怎樣做?」、「部門的寫字樓要搬去北部都會區,你會怎樣去準備?」又或者「上司要刪減你團隊的人數,但你又要維持服務的KPI,你會怎樣處理?」面試官亦會根據你的答案去作出追問。記得回答時要表現自信,保持臨危不亂,嘗試理性分析,表現出自己的辦事能力和潛質。

EO面試題目拆解及技巧

自我介紹

自我介紹是每次面試都一定有的,也是每個考生必須準備的。關於自我介紹,先前已作介紹你要做的就是準備一個可伸縮的自介,重點突出自己的長處與特點,而及你的長處和特質怎樣滿足職位的要求,而不是要把自己的CV由頭到尾同interviewer報告一次。至於要highlight什麼呢?首先關於學歷,可以不只報自己咩大學咩學系畢業,而係要講下你讀書既知識對你之後的工作有咩用。例如如果是中英文系就比較容易講,就係你語言能力好,表達能力好,對日後EO既工作好有幫助。又例如你係讀政政的,對政府架構、公共行政都有瞭解,對日後工作又係好有幫助。至於其他學系,你就要諗下點樣吹,真係冇野吹,都可以講下你讀個科對於自己個思維同埋性格有咩好處。例如,你諗野會唔會更小心、細心,更多角度。更有批判性及全面性思維等等。

如果有工作經驗的話,就要講出黎。如果你係學生,咁就講下做實習時既經驗。但太細微的唔洗講。如果你做的個案同政府有關的,就可以拎出黎講多少少。至於其他工作,就講下,呢d經驗點樣可以令你成為一個勝任EO的考生。

記住無論提及你的什麼經驗、技能及特質,最後亦都要扣題,講下點解這些東西會令你成為一個suitable candidate。

履歷題

自我介紹之後,CEO就會針對你的報名表同CV問問題。流程及問題同私人市場其實大致相約。

例如:

  • 我見你之前做過ABCDE工,你既工作內容係咩架?有無試過做領導者角色?
  • 我見你報左幾個唔同職系。 有冇得面試 ?面試成點?
  • 我見你有報其他職系,如果全部都有offer,你會點樣選擇?為什麼?
  • 你覺得EO的職務之中有邊項對你黎講最有挑戰性?點解?
  • 我見你之前做左幾年ABCDE,點解唔做?走黎做EO?
  • 我見你都讀左ABCDE,點解唔再讀上去?
  • 我見你有去ABCDE exchange/做intern,果陣你負責咩架?學到d咩?有咩得著?
  • 黎面試之前,你做左d咩準備呀?
  • 你大學個major係咩呀?可唔可以分享下係讀咩架?
  • 說說你的二個強項和弱項。
  • 點解想加入政府?知唔知政府同私人市場有咩分別?
  • 點解想離開之前間公司?
  • 你畢業之後有冇咩計劃?

 

情境題

呢part係最重要的一部分。因為呢part係考驗你成為EO的能力。情景題一般以英語問答,留意回答時語速不要太快,多用指示語,組織好答案框架,確保考官能清楚了解你的答案。情景題相當重要,盡量詳細解釋自己的決定和背後的原因,考官必然會追問和挑戰你的答案,緊記冷靜應對和保持正面的態度。

如果SEO追問你,唔代表你答得差。相反,佢可以係對你好有興趣。所以請務必冷靜對答。

來到這一部份,你最重要的是要知道EO之後有咩野要做。到底EO有d咩野日常職務呢?根據以下官方描述:

行政主任是專業管理人員,特別擅長資源和系統管理。他們會被調派到各個決策局或政府部門工作,肩負多類職務,也有機會與不同背景和專長的人士共事。行政主任提供廣泛的行政支援,主要包括人力資源管理、部門行政、一般行政支援、地區行政及委員會和議會支援服務、行政和政策支援、計劃管理、規管職責和投訴管理、財政資源管理、活動統籌、以及系統/項目規劃與發展

Executive Officers are professional managers who specialise in resource and system management.  Posted around different policy bureaux and government departments, they enjoy a wide variety of work and have the opportunity to work with people of different backgrounds.  They are mainly deployed to provide support in a wide range of executive functions including human resource management, departmental administration, general administration support, district administration and support to boards and councils, executive and policy support, scheme administration, regulatory functions and complaints management, financial resource management, event management, and system / project planning and development.

EO行政主任主要負責支援行政工作,所以可預見情境題都是一些辦公室常見的衝突和問題。例如:

  • 部門需要cut 資源,要你精簡架構但要同時符合KPI,你會點處理?
  • 下屬缺勤/誠信/行為/不上心/工作能力低的問題,如何處理?
  • 市民投訴,而且不願意離開,要求退款等,如何處理?
  • 辦公室爲市民提供牌照櫃檯服務。如果在日間工作時間電腦系統壞了,未能處理排了隊很耐的市民,你作爲負責人,如何處理?

時事題

時事題中不少與當年的政府政策或社會議題有關,可多留意施政報告、財政預算案及立法會文件。遇到真的不了解的時事問題,有誠意地說聲「不好意思,自己沒有留意這議題的資訊,表示自己會在面試後認真了解相關新聞」就可以了。正常情況下,考官就會問其他問題。千萬不要亂作事實!考官們問的都是自己已經十分熟悉的課題,胡亂作答只會扣分,甚至讓人覺得你沒有誠信。常見的問題例子:

  • 為了減少垃圾,有議員提出全面禁用即棄餐具,包括膠和木等。請問呢個提議有咩好壞之處,並提出措施如何落實或者其他建議?
  • 鑑於很多年輕人缺乏還款能力,應否收緊小額放債人的發牌條件? 請問呢個提議有咩好壞之處,並提出措施如何落實或者其他建議?
  • 有議員提議政府提供一次性生育津貼,例如每次20萬港元,以提高香港生育率。請問呢個提議有咩好壞之處,並提出措施如何落實或者其他建議?
  • 有人認為政府應對長者高齡津貼的受助長者進行經濟情況調查,以確保公帤用得其所。請問呢個提議有咩好壞之處,並提出措施如何落實或者其他建議?
  • 有議員提議香港政府應全面收回粉嶺高爾夫球場改變土地用途興建住宅。請問呢個提議有咩好壞之處,並提出措施如何落實或者其他建議?

EO面試必須留意的事

衣著必須正規整齊

衣著務必得體,建議穿上全套西裝,並需要打領呔。

千萬不要遲到

請盡量使用鐵路,提早到達考場,如果你需要搭巴士或路面交通,請提早出門,並在面試前關上手提電話。

檢視自己的經驗

面試初期較多與申請職位時填寫的履歷有關,包括學歷、工作經驗等,提交申請表時應事先記錄,方便了解考官有機會問什麼問題。

不要被考官的表情影響

考官有時會故意擺出不滿的反應和表情以對考生作壓力測試,部分考官會非常嚴肅,並不代表考生表現欠佳,面試時無須過份緊張。

最後一條問題十分重要

面試結束前,考官會詢問是否有問題提出,請你事先準備一條能輕輕顯出你熱誠的題目,例如想成為一個好EO有什麼條件。但不要太過激進,只需輕輕顯示出你對職位的熱誠便可。

 

 

撰文:daddy最後更新日期:2022-12-10

使用100%香港製造的平台 - 我們誠意推薦: